HATIMAMAYE GUNINITA NA MGEJA WAHAMIA CHADEMA

MWENYEKITI wa Chama Cha Mapinduzi (CCM) Mkoa wa Shinyanga, Khamis Mgeja amesema chama hicho kimeacha misingi yake na sasa kimegeuka kuwa ya kampuni.

Mbali na hilo, pia alimpiga kijembe mgombea urais kupitia CCM, Dk. John Magufuli akimfananisha na dereva ambaye hajaweza kuendesha gari vizuri ‘learner’ akimaanisha kuwa hana uwezo wa kukiongoza chama hicho.

Mgeja alitoa kauli hiyo jana jijini Dar es Salaam wakati akitangaza kukihama chama hicho na kujiunga na Chama cha Demokrasia na Maendeleo (Chadema), huku akiambatana na aliyekuwa Mwenyekiti wa CCM Mkoa wa Dar es Salaam, John Guninita ambaye na yeye amejiunga na chama hicho kikuu cha upinzani nchini.

Mwanasiasa huyo mkongwe aliyepata kushika nyadhifa mbalimbali ndani ya CCM, alisema ametumika ndani ya chama hicho kwa muda mrefu huku akishiriki kurekebisha kasoro mbalimbali zilizojitokeza lakini sasa imefika mwisho.

“Pamoja na kuzirekebisha kasoro zilizojitokeza mara kadhaa lakini kila jambo lina mwisho wake na kurekebisha mambo hayo nayo inafika mwisho.

“Chama sasa kimekuwa cha BMW yaani cha baba, mama na watoto. Kwa maana hiyo chama kimekuwa cha kampuni au familia ndio maana maoni ya wanachama na wananchi yanapuuzwa,”alisema.

Mgeja ambaye pia aliongozana na makada wengine wa chama hicho, alisema yeye pamoja na wenyeviti takribani 23, wajumbe wa Halmashauri Kuu (NEC) pamoja na baadhi ya wabunge waliona mabadiliko yanahitajika ndani ya CCM.

“Matatizo ndani ya chama ni makubwa tunastahili tupate dereva fundi kwa sababu sisi tuliokitumikia chama tunakifahamu hapa tulipofika hivyo kinahitaji ukarabati mkubwa na tukashawishika kuwa Lowassa anaweza.

“Lakini kwa bahati mbaya mawazo ya wanachama, wananchi mwenyekiti wetu ameyapuuza. Nilikuwa navuta subira angekuwa muungwana angezungumza na kuomba radhi kwa aliyoyafanya kwani hayavulimiliki. Anakuja kwenye vikao vizito na akiwa na majina matano mfukoni.

 “Tukamwuliza atusomee sifa za hao wagombea watano lakini akafanya ubabe, akatengeneza nguvu kubwa, polisi wakazunguka lile jengo wakiwa na mabomu, farasi, gari ya maji ya washasha na hata ndani ya ukumbi polisi walikwepo wakiwa na mabomu.

“Nilimwuliza mwenyekiti kwamba leo tuko Burundi…tunawalalamikia kina Nkurunziza kumbe tunao wengi Tanzania. Tulipekuliwa na vijana wadogo wanakutana na hirizi zetu.

“Taswira ya chama imeondoka. Mliona kina Emmanuel Nchimbi walitoka wale hawakuwa wajinga waliona kasoro kubwa imefanyika,”alisema.

Alisema chama kimekuwa si kile cha wakati wa Mwalimu Nyerere kimejaa chuki, rushwa, fitna, kimepoteza mwelekeo na kwamba nguvu zilizotumika wakati wa kumpata mgombea urais ilikuwa hatari sana.

“Chama kilikuwa kinahitaji dereva fundi, lakini sasa kimekabidhiwa kwa Magufuli ambaye ni dereva leaner, hajawahi hata kuwa balozi wa nyumba kumi hata mimi hanifikii nusu, nilitegemea mwenyekiti wa chama angewaomba radhi wanachama lakini ameshindwa.

 “Mwenyekiti anakiacha chama vipande anaachaje kumweka Mwandosya kweli anazidiwa sifa na January Makamba, hata waziri mkuu wake ameshindwa kumwamini huku jana yake akimpongeza kuwa ni jembe lake.

 “Hata Sitta wakati ule wa spika alijitahidi ajibadilishe ikashindikana, sasa amemtumia bunge la katiba naye kachinjiwa mbali, Tyson, Sumaye wote wamechinjiwa mbali halafu anamuweka naibu waziri,”alisema.

Alisema kutokana na hayo ameamua kujiunga na Chadema kwenda kuongeza mapambano.

 “Kwanza nimuenzi Mwalimu Julius Nyerere aliposema kwamba watu wakiyataka mabadiliko wakayakosa ndani ya CCM wayatafute nje ya chama hiki. Sasa mimi ninamuenzi kwa moyo mkunjufu, nimeamua kuchana na CCM.

“Kwa heshima kabisa bila kumung’unya maneno natamka kujiunga na Chama cha Demokrasia na Maendeleo (Chadema) tukapambane huko,”alisema Mgeja huku akikunja ngumi na kusema ‘peoples’.

Pia aliwataka makada wa chama chake ambao wamekuwa na tabia ya kurusha vijembe na kumchafua Waziri Mkuu wa zamani, Edward Lowassa wakapambane kwenye midahalo kwa hoja.

“Kama wao ni wanaume sasa twende kwenye midahalo wasimung’unye maneno kusema ukweli. Na haya niliyoyafanya mimi na wenzangu ndiyo maamuzi magumu,”alisema.

GUNINITA                                       

Kwa upande wake aliyekuwa Mwenyekiti wa CCM Mkoa wa Dar es Salaam, John Guninita alisema amezaliwa akiwa CCM na kwamba alikitumikia chama hicho kwa muda wa miaka 35, lakini kutokana na kukiukwa kwa misingi ameamua kuhama.

Alisema ni dhahiri kuwa vijana wadogo ambao wanawatukana viongozi wenye umri zaidi ya baba zao, wametumwa chama.

“Haiwezekani kijana mdogo anamtukana viongozi wakubwa huku chama kikikaa kimya na mwishoni kupata uongozi kwa utaratibu wa uyoga uyoga, sijui laana hii wataipeleka wapi,”alihoji Guninita.

Alisema CCM kilipofikia sasa kinakufa kama ilivyokuwa kwa chama cha KANU cha Kenya na UNIP ya nchini Zambia.

“Binadamu anapozaliwa anakuwa na malengo yake, inafika unaugua na kufa na sasa CCM kinaugua na majibu ya dokta ni lazima yaonyeshe kuwa kimekufa,”alisema.

Alisema makada wa chama hicho ambao wamekuwa wakimshambulia Lowassa watashughulikanao kwenye kampeni na kwamba waziri mkuu huyo zamani akae kimya kwa kuwa yeye anawamudu.

“Edward atuachie sisi tuna uwezo wa kuwamudu hawa makuruta wa siasa wa aina ya Nape,”alisema Guninita.

Mwisho.

WANAOGAWA VIWANJA JANGWANI KUKIONA

MANISPAA ya Ilala imesema itawachukulia hatua watu wanaogawa viwanja kwa wamachinga katika eneo la jangwani kwa madai kuwa wameruhusiwa na uongozi kufanya hivyo.

Akizungumza na waandishi wa habari jana jijini Dar es Salaam, Mkurugenzi wa manispaa hiyo, Isaya Mngurumi alisema hawajamruhusu mtu yeyote kugawa viwanja bali waliwaruhusu kupanga chini bidhaa zao kama wanavyofanya katika mitaa ya kariakoo.

“Nimetuma timu kuwatafuta watu wanaogawa maeneo hayo kwani waliokimbilia huko si walengwa ni wajanja wachache tu,” alisema Mngurumi.

Alisema walikaa na uongozi wa manispaa ili kutafuta eneo la wafanyabiashara wadogo ndipo wakateua jangwani kuwa sehemu ya muda wakiwa bado wanaandaa masoko rasmi.

“Tumechagua jangwani upande wa kushoto wa barabara kama unaelekea kigogo kama sehemu ya muda kabla hatujaweka miundombinu ya vyoo wamevamia na kugawana bila ruksa ya manispaa,” alisema Mngurumi.

Alisema upande wa kulia wa barabara ni eneo la huduma za kijamii hasa uwanja wa mikutano ya hadhara na stendi ya mabasi yaendayo kasi.

Aidha alisema wako katika mkakati wa kujenga masoko ambayo yatawasaidia wafanyabiashara hao wadogo kuwa katika maeneo ya kudumu ya kufanyia shughuli zao.

Aliyataja masoko hayo kuwa ni Kisutu, Buguruni na Mchikichini ambapo wanaongea na wadau mbalimbali ili kupata mikopo kwa ajili ya ujenzi.

“Tumeingia mkataba na Benki ya TIB ili kujenga soko la kisutu kwa gharama ya sh. bilioni 11,” alisema.

mwisho  

         

TAHADHARI YATOLEWA KWA WANUNUA ARDHI

MKUU wa Wilaya ya Mkuranga, mkoani Pwani Abdallah Kihato amewatahadharisha watu wanaokwenda kununua ardhi katika wilaya yake hasa vijiji vinavyopakana na Ilala kuwa makini na matapeli wanaovamia maeneo hayo.

Akizungumza na Blog hii jana ofisini kwake, Kihato alisema kumeibuka malalamiko mengi hasa katika kijiji cha Tambani kuwepo matapeli wanaovamia mashamba yasiokuwa yao na kukata viwanja na kuuzia watu kwa madai kuwa eneo hilo liko Ilala.

“Ni muhimu kwa wanunuzi kufuata taratibu zote za ununuzi wa ardhi kwa kuwashirikisha viongozi wa kijiji ili kuthibitisha kama muuzaji ni eneo lake,” alisema kihato.

Alisema wanazo idara za ardhi kwa kila ngazi na upo utaratibu kwa mnunuzi na muuzaji kufika ofisi za kijiji kutambuliwa.

“Wakati mwingine watu wetu wanaingia katika migogoro hiyo kutokana na kuwa na haraka, wanakosa udadisi hawawezi hata kujiridhisha kwa majirani,” alisema Kihato.

Alisema wamekubaliana na Mkuu wa Wilaya ya Ilala kuwa na kikao cha pamoja cha kamati za ulinzi na usalama kutokana na lawama nyingi za uvamizi kuripotiwa kutokea maeneo ya Wilaya hiyo.

“Migogoro mingi imetokana na kuharibiwa kwa ramani ya mwaka 1974 inayoonyesha mipaka ya wilaya hizi mbili,” alisema.

Alisema hati nyingi zimeandikwa kuwa kijiji cha Tambani kiko Ilala kitu ambacho si kweli hakuna mtaa huo katika wilaya hiyo.

Migogoro hiyo ya ardhi katika eneo hilo imesababisha watu wawili kupoteza maisha yao kutokana na mapigano kati ya wakazi na jamii ya Wakurya wanaodaiwa kuvamia maeneo ambayo si ya kwao.

mwisho

TAKATAKA SASA KUTENGENEZWA MBOLEA

HALMASHAURI ya Manispaa ya Kinondoni imeingia makubaliano na Jiji la Humburg  la Uingereza kujenga mtambo wa kuchakata taka katika eneo la Mabwepande.

Ujenzi wa mtambo huo utagharimu    Sh bilioni 3.5.

Hayo yalielezwa Dar es Salaam jana na Meya wa Manispaa hiyo, Yusuph Mwenda wakati wa uzinduzi wa soko la wafanyabiashara wadogo Sinza.

“Tayari tumepata kiwanda ambacho tutakitumia kuchakata taka za ‘organic’ ambazo zitatengenezwa mbolea ambayo tutaitumia kwa   matumizi mbalimbali.  Mradi huo tunatarajia utatengeneza ajira zaidi ya 1,000,” alisema Mwenda.

Akizindua soko hilo, alisema litasaidia kupunguza idadi ya wafanyabiashara wasiokuwa na maeneo maalum ikizingatiwa lina vizimba 512.

“Kunzia KESHO mnaruhusiwa kuanza kufanya biashara kwa sababu soko hili tumelijenga si mapambo tunataka kukabiliana na changamoto ya wafanyabiashara kutokuwa na maeneo maalum pamoja na ukosefu wa ajira.  Vipo vizimba 512 kwa maana hiyo tutapunguza kwa kiasi changamoto hii,” alisema.

Alisema manispaa hiyo pia imeanza ujenzi wa soko jingine kubwa eneo la Mburahati litakalogharimu Sh bilioni 1.8  kwa ajili ya   wafanyabiashara wa bidhaa ndogo ndogo.

  Meneja msimamizi wa soko hilo, Elichilia Mushi alisema   limejengwa kwa mfumo wa kisasa ili kuboresha huduma za wafanyabiashara hao.

“Tumepanga wafanyabiashara kulingana na aina ya bidhaa aliyonayo, lengo letu ni kuwavutia watu wengi zaidi na kuboresha huduma ya soko hili kuwa tofauti na mengine.  Pia tunazingatia suala la usafi,” alisema.

Alisema katika kutekeleza hilo zimewekwa sheria, kanuni na utarabu ambao utawasaidia kuboresha usafi ndani ya soko hilo.

MFUMUKO WA BEI WAENDELEA KUPAA

MFUMUKO wa bei wa Taifa kwa mwezi juni, 2015 umeongezeka hadi asilimia 6.1 ukilinganisha na asilimia 5.3 kwa Mei mwaka huu.

Hii inamaanisha kuwa kasi ya upandaji wa bei za bidhaa na huduma kwa mwaka ulioishia mwezi Juni 2015 ikilinganishwa na kasi iliyokuwepo kwa mwaka ulioishia Mei 2015.

          

Akizungumza na waandishi wa habari jana jijini Dar es Salaam Mkurugenzi wa Sensa ya Watu na Takwimu za Jamii, Ephraim Kwesigabo alisema ongezeko hilo limechangiwa na kuongezeka kwa bei za baadhi ya vyakula na zisizo za vyakula katika kipindi kilichoishia juni mwaka huu.

Alisema fahirisi (kipimo) za bei zimeongezeka hadi 158.12 Mei, 2015 kutoka 148.98 juni, 2014.

"Mfumuko wa bei umeendelea kuongezeka pia kutokana  na ongezeko la bei za mafuta hasa petrol kwa asilimia 5.2 na diesel kwa kwa asilimia 4.5.

"Mfano mwenendo wa bei za baadhi ya bidhaa za vyakula kama zilizoonyesha kuongezeka mwezi juni 2015 zikilinganishwa na bei za juni,2014 ni pamoja na mchele kwa asilimia 31.5, mahindi kwa asilimia 8.1,unga wa muhogo asilimia 3.7, nyama asilimia 3.1, samaki asilimia 12.0 na maharage asilimia 11.6. alisema Kwesigabo.

Kwesigabo alisema mfumuko wa bei kwa bidhaa  zisizo za vyakula zilizochangia kuongezeka kwa kwa mfumuko wa bei mwezi juni 2015 zikilinganishwa na bei za juni 2014 na pamoja na bei za mavazi wanaume kwa asilimia 3.6, mavazi ya wanawake asilimia 2.6,vyakula kwenye migahawa kwa asilimia 3.5, na huduma za malazi kwa asilimia 3.1.

"Mfumuko wa bei kwa kipimo cha mwezi umeongezeka kwa asilimia 0.2 mwezi juni, ukilinganisha na 0.4 kwa mwezi mei mwaka huu mwaka huu," alisema.

Alisema uwezo wa shilingi 100 katika kununua bidhaa na huduma umefikia shilingi 63 na senti 24 mwezi juni, mwaka huu kutoka Septemba, 2010 ikilinganishwa na shilingi 63 na senti 35 mwezi Mei mwaka huu.

Alisema hata hivyo mfumuko wa bei nchini una mwelekeo unaofanana na baadhi ya nchi za Afrika Mashariki ambapo kenya umeongezeka kwa asilimia 7.03 kutoka asilimia 6.87 mwezi mei 2015 na Uganda kubaki 4.90 kama ilivyokuwa mwezi mei mwaka huu.

Aidha amewaomba wananchi kutoa ushirikiano wa dhati kwa ofisi za takwimu za mikoa wakati wa ukusanyaji wa takwimu mbalimbali kwa lengo la kutoa taarifa zilizo sahihi kwa ajili ya maendeleo ya nchi yetu.