bomoa bomoa kurasini wakazi hali tete

WAKAZI wa Kurasini Shimo la Udongo wamejikuta wakikosa makazi baada ya nyumba 45 walizokuwa wakiishi kubomolewa ili kupisha upanuzi wa bandari na ujenzi wa maegesho ya malori.

Ubomoaji huo ulifanyika jana, saa moja asubuhi hali iliyosababisha wananchi wa eneo hilo kujikuta wakitawaliwa na vilio, simanzi kutokana na kuharibiwa kwa mali zao zilikuwemo ndani ya nyumba hizo.

Wakati kazi hiyo ikiendelea polisi walikuwa wameimarisha ulinzi katika eneo hilo, wakishirikiana na Shirika la Umeme Tanzania (TANESCO), ambao walikuwa na jukumu la kuzuia kutokea kwa tatizo la umeme kwa nyumba zilizokuwa na nishati hiyo.

Bomoabomoa hiyo iliwanufaisha vibaka waliokuwa wakivamia na kupora vitu wakati kazi ya ubomoaji ilipokuwa ikiendelea huku vijana wengine walinufaika na ajira ya uokoaji kwa kulinda mali zao.

Akizungumza na FICHUA Diwani aliyemaliza muda wake, Wilfred Kimati alisema, ubomoaji huo umefanyika kinyume cha sheria kwakuwa wananchi bado walikuwa wakidai malipo yao.

Alisema eneo hilo lilifanyiwa tathimini na mthamini kutoka Wizara ya Ardhi Nyumba na Makazi ambapo wananchi wa eneo hilo walikuwa 161 na walitakiwa kulipwa fidia ya Sh. Bilioni 16.

Kimati alisema eneo hilo limechukuliwa na mwekezaji kampuni ya Easy Netwotk Solution ambao walikubali kulipa fidia stahili na eneo hilo litumiwe kwa maegesho ya magari makubwa.

“Tumebaini Manispaa ya Temeke ina vitabu viwili vya tathmini ambapo malipo yaliyofanywa yakionyesha kuwepo makato makubwa kwenye fidia hali iliyosababisha baadhi ya wenye nyumba 64 kufungua mashauri mahakamani kugomea fidia hiyo wakidai walipwe iliyokuwa imepangwa na wizara,”alisema Kimati.

Kimati alisema eneo hilo lina nyumba 165 ambapo nyumba 45 ndiyo zimebomolewa zikiwemo zilizokuwa kwenye zuio la Mahakama jambo ambalo ni ukiukwaji wa sheria.

Kwa upande wake, mwananchi James Mwakalobo alilalamikia nyumba yake kubomolewa wakati ikiwa na zuio la mahakama.

Naye, Mwenyekiti wa mtaa huo, Rajabu Nkumilwa alisema, manispaa hiyo imekiuka kwakuwa wananchi wake walikuwa na madai ya msingi.

Alisema wananchi wanalia na upunjwaji wa fidia kwakuwa wengine wamelipwa kiwango cha chini Sh. Milioni 27 hadi Mil.188 wakati nyumba hizo zilikuwa na hatimiliki na thamani kubwa.

“Wananchi walikubali uhakiki wa malipo ya fidia ya Wizara ya Ardhi Nyumba na Makazi lakini cha ajabu manispaa ya Temeke nao wameingilia kati na kupunja fidia za wananchi hawa,”alisema Nkumilwa.

Akijibu hoja hizo Mkurugenzi wa Temeke, Photidas Kagimbo alisema ubumoaji wa eneo hilo ulikuwa sahihi kwakuwa notisi ilianzia Juni 10 mwaka huu na ilikuwa ya siku 60 na hadi jana wanafanya ubomoaji ilikuwa ni siku 150.

Alisema wananchi wenyewe walisaini mkataba wa malipo na wengi wao wamepokea malipo hayo kilichobaki ni kulibadili eneo hilo kuwa la kisasa kwa ajili ya matumizi kusudiwa.

“ Wananchi wamedhamiria kuendelea kuishi katika eneo hilo huku wakijua kuwa ni kunyume…lakini taratibu zimefuatwa na ubomoaji utaendelea ili miradi mingine iendelee na kuongeza pato la taifa,”alisema Kagimbo.

Naye, Kaimu Mthamini wa manispaa hiyo, Victor Ndonne alisema mradi huo ulibuniwa na manispaa tangu mwaka 2006 na tangu wakati huo kumekuwa na hatua mbalimbali za utwaji maeneo kwa ajili ya shughuli hiyo.

Alisema manispaa ilimwandikia Katibu Mkuu wa Wizara ya Ardhi , Nyumba na Maendeleo ya Makazi ili itolewe idhini ya kufanya mapitio ya mradi huo.

Ndonne alisema katibu mkuu alitoa idhini ya mapitio ya mradi huo ambapo manispaa kwa kushirikiana na mthamini Mkuu wa Serikali walitengua uhalali wa kitabu cha kwanza na kukubaliana kwa pamoja kutumika kwa kitabu cha pili.

“Mapitio yalifanyika baada ya mwekezaji kulalamika gharama ya mradi huku kuna miradi mingine imefanyika kipindi kama hicho na gharama zake zilikuwa chini,”alisema Ndonne.

Waandishi wa Mtanzania walishuhudia tingatinga T 502 CZP, T 202 CFN, T 159 BED na T 205 DCS zikiwa katika eneo hilo zikiendelea na ubomoaji huku baadhi ya wananchi wakiwa wanalinda mali zao nje wakiwa wamekosa makazi.

NANI WAZIRI WA KILIMO?

SEKTA ya kilimo ni moja ya sekta muhimu hapa nchini ambayo hapo zamani tuliita kuwa ni uti wa mgongo wa uchumi wetu.

Mara baada ya nchi yetu kupata Uhuru, Serikali ilitoa kipaumbele cha kwanza katika kuendeleza kilimo kama uti wa mgongo wa uchumi wa nchi.

 Kilimo kiliajiri zaidi ya asilimia 90 ya wananchi wote kwa mazao ya katani, kahawa na pamba yaliongoza kulipatia Taifa fedha za kigeni taifa hili.

kwa sasa ajira inayotokana na kilimo imeshuka hadi asilimia 80 tu ya watanzania ambapo pato la fedha za kigeni kutokana na mazao ya kibiashara limeshuka kutokana na kukosekana mipango na utekelezaji wa sera zinazosimamia sekta hii.

Katika awamu ya kwanza kumekuwapo kaulimbiu na maazimio mbalimbali kama vile “Chakula ni Uhai”, “Siasa ni Kilimo”,“Kilimo cha Kufa na Kupona”, “Mvua za Kwanza ni za Kupandia” ili kuhamasisha maendeleo ya kilimo, pamoja na kuhamasisha kilimo cha ujamaa.

Awamu ya Pili iliongozwa na Rais Ali Hassan Mwinyi ambapo tulishuhudia mageuzi ya kiuchumi ambayo yalikuwa kichocheo kikubwa katika maendeleo ya kilimo ikiwa ni pamoja na utekelezaji wa Sera ya Kilimo ya mwaka 1983.

Awamu ya tatu ya uongozi ilikuwa chini ya Rais Benjamin William Mkapa ambapo katika awamu hiyo kilimo kilipata msukumo wa kipekee kwa kuonyesha mwelekeo Katika awamu hiyo kutokana na

utekelezaji wa Sera ya Taifa ya Kilimo na Mifugo ya mwaka 1997 na uanzishwaji wa Mkakati wa Kuendeleza Sekta ya Kilimo ulishuhudia kilimo kikikua kutoka chini ya asilimia 3 hadi asilimia 6 kulinganisha na awamu zilizotangulia.

Awamu ya nne ya uongozi ambayo ipo chini ya Rais Dk. Jakaya Kikwete, licha ya kilimo kuendelea kupewa kipaumbele kikubwa, kwa kaulimbiu mbadala ya kilimo kwanza pamoja na utekelezaji wa Programu ya Kuendeleza Sekta ya Kilimo (ASDP) na Programu ya Mageuzi na Modenaizesheni ya Ushirika (CRMP) ambazo zimekuwa chachu ya kuleta mapinduzi ya kijani hapa nchini lakini lengo halikutimia ipasavyo kutokana na

Licha ya hayo Jambo kubwa la kujivunia kutokana na kilimo ni kuwa

kwa sasa asilimia 95 ya mahitaji ya Taifa ya chakula kinazalishwa hapa hapa nchini kwa Serikali kuweka mfumo wa kuhifadhi chakula kwa ajili ya matumizi wakati upungufu unapotokea ili kukabiliana na baa la njaa. Takwimu zinadhihirisha kwamba akiba ya Taifa ya Chakula imekuwa ikiongezeka kila mwaka na uwezo wa Wakala wa Taifa wa Hifadhi ya Chakula unatarajia kufikia tani 400,000.

Kwa takribani miongo mitano na ushei ya Uhuru wa nchi yetu, pamoja na kuwa na changamoto nyingi za kisiasa, kijamii na kiuchumi, kilimo chetu kimeendelea kuwa nguzo kuu na mhimili wa kujitoshereza kwa chakula tu.

Lakini iwapo tutakuwa na uthubutu wa kuwekeza inavyopaswa katika kilimo tutaweza si tu kujitoshereza kwa chakula bali pia kupiga hatua za maendeleo kwa sekta hiyo adhimu, pengine kiasi cha kurudisha tija kubwa ya pato la kigeni inayoweza kupatikana kwa kurekebisha mikakati ya mazao ya kibiashara kwa kulenga mahitaji ya sasa ya soko.

Kimsingi baadhi ya maeneo muhimu yanayopaswa kuangaziwa na awamu ya tano ya serikali ili kukirudishia kilimo hadhi yake kamili ni pamoja na tathmini muafaka ya kilichosababisha kudorora kwa sekta hiyo, ili kubaini nini kifanyike kiutekelezaji ili kufikia ufanisi wa hali ya juu.

Mathalan, baadhi ya maeneo muhimu yanayopaswa kutazamwa upya ni pamoja na upatikanaji nafuu wa pembejeo ambao umekuwa ukisuasua kutokana na gharama kuwa kubwa ukilinganisha na uwezo wa wakulima wetu.

Uwekezaji muafaka wa mbinu za kisasa za kilimo kwa kuzingatia matumizi ya nyenzo, mbolea, kubaini aina ya mazao yanayofaa kulimwa katika ardhi husika pamoja na kuboresha weledi wa maafisa ughani katika kusimamia kiklimo cha kimapinduzi, kitakacholitoa taifa letu katyika kilimo cha mazoea kwa ajili ya chakula lakini kikakidhi pia mahitaji ya kibiashara na kiuchumi.

Kwa historia ya sekta hiyo hapa nchini kuna mengi tunayoweza kutohoa kutokana na utekelezaji wa miaka iliyopita, mojawapo ni kuwepo kwa mashamba ya ushirikika kwa kuwa kimsingi licha ya mengi kati ya mashamba hayo kufa kifo cha asili lakini bado vyama vya ushirikika vipo. Ni suala la kugeuza tu mashamba yaliyokuwa katyika muundo huo hata yaliyomilikiwa na serikali, kuwa mikononi mwa wakulima lakini msisitizo ukiwekwa katika upatikanaji masoko ya kuuzia mazao yatakayovunwa.

Hayo yakitekelezwa vyema dhima nzima ya uwepo wa viwanda ili vitumie ghafi muhimu inayozalishwa kwa kilimo, ndipo itaweza kutimia kikamilifu kwa kuwa soko la dunia la kilimo kwa sasa limeegemea bidhaa zitokanazo na kilimo zilizokuwa tayari kwa matumizi na si ghafi inayopaswa kuandaliwa kuwa bidhaa.

hiyo mikakati ya serikali ya awamu ya tano iliyojinasibu kufufua viwanda wakati wa kampeni itatimia si kwa kuangalia upande huo tu, bila kuhusisha kilimo kwa kuwa ilidhihirika wazi wakati wa awamu ya kwanza zao la pamba lilikuwa na soko kubwa la ndani kutokana na kuwepo viwanda vingi vya kuzalisha nguo, kabla ya ziada kuuzwa nje na kutupatia fedha za kigeni.

Kuwekeza kwenye viwanda sanjari na kilimo kuna faida nyingi kwa kuwa tumezungukwa na masoko yaliyo tayari kupokea bidhaa zetu katika jumuiya zinazotuzunguka ikiwemo SADC na EAC anvayo kwa sasa ina soko kubwa zaidi kwa kuwa inajumuisha nchi tano, tofauti na ilivyokuwa awali ilipoundwa na nchi tatu.

Tukienda mbali zaidi kuna fursa za kimataifa kama ule mpango wa AGOA ambao bado unatuwezwesha kupata pato kubwa la kigeni nchini Marekani, bila gharama ya tozo la ushuru wa kuingiza bidhaa nchini humo.

Na kwa kuwa kinara wa awamu ya rtanio Raisi Magufuli anatokea katika wizara ya ujenzi na awali alitumikia uchukuzi na uvuzi, tunaamini akiunganisha vyote hivyo na kunasibisha kilimo naviwanda uchumi utakuwa kwani bidhaa zinazozalishwa zinahitaji miundo mbinu bora kufikia walaji wa ndani na nchi jirani…

Lakini ili kufikia mafanikio ya kiwango cha juu kwa sekta hizo zinazotegemeana kuna haja ya makusudi ya kutathmini baadhi ya changamoto zilizosababisha kilimo kidumae zikiwemo ardhi ya kilimo kutotambulika kisheria hivyo kubadilishwa matumizi, jambo linalozalisha migogoro holela baina ya wawekezaji na wananchi wazawa waliomilikishwa maeneo kwa njia ya kurithi.

Mabadiliko ya tabianchi yanayosababisha kilimo kushindwa kutoa ajira kutokana na upungufu wa mvua, jangwa na kuongezeka kwa joto duniani.

 Ushiriki hafifu wa sekta binafsi katika kilimo ambapo sekta nyingi zimejikita kuwekeza katika fani nyingine.

 Ushiriki hafifu wa vijana katika kilimo ambao ndio mguvu kazi na rasilimali watu kwa kuwa ndio wenye nguvu na uwezo mkubwa, kukikwepa kilimo kwa kukimbilia mijini kufanya biashara zisizo endelevi.

              

Uwezo mdogo wa wakulima kununua zana bora na pembejeo za kilimo

 Miundombinu duni katika maeneo ya uzalishaji wa mazao ya kilimo

Msukumo wa kuzalisha mazao ya nishati mbadala na madhara yake unakinzana na lengo kuu la kuzalisha mazao ya chakula kwa baadhi ya wakulima ambapo wengi huangazia kilimo cha chakula na kuachana na mazao ya biashara.

Gharama kubwa ya ujenzi wa miundombinu ya kilimo cha umwagiliaji pamoja na maghara ya kuhifadhia mazao pindi yanapovunwa.

Uvamizi wa visumbufu vya mimea yanayoshindikana kudhibitiwa ambavyo ni pamoja na wadudu na magonjwa mbalim bali ya mimea.

Elimu duni walionayo wakulima pamoja na wadau wa mbalimbali wa kilimo juu ya masuala ya ushirika pamoja na vyama hivi kukosa mitaji na kubaki vikikopa mazao ya wakulima.

Usimamizi hafifu wa sera ya soko huru ambapo dhana hiyo imekuwa kinyume na matarajio ya wengi na sasa ni kama soko holela lisilokuwa na mdhibiti.

Idadi ndogo ya wataalam wa kilimo na ushirika pamoja na maslahi duni ukilinganisha na mazingira wanakohitajika kufanya kazi.

Kukosekana kwa mikopo yenye masharti nafuu ya kuendeleza kilimo kwa mabenki mengi kukwepa kukopesha sekta hiyo kwa kuichukulia kuwa Nyanja isiyotabirika katika uwezo wa kurudisha mikopo.

Kimsingi pia lazima kuwekeza kwa vivutio vya makusudi vitakavyosababisha nguvu kazi kubwa hususan vijana kujishugulisha na kilimo kama njia ya kuendesha maisha yao na kubadili mtazamo mzima juu ya sekta hiyo, kwa kurejesha hamasa za kimatendo zaidi kwa kutumia mbinu za zamani kwa mabadiliko ya kisasa kuanzia ngazi za awali kabisa za mafunzo ya vinaja wetu katika ngazi mbalimbali za elimu ili wasikikimbie kilimo badala yake wavutiwe nacho. 

Kwa kutimiza hayo na mengine muambatano naamini kauli mbiu ya HAPA KAZI TU itajisadikisha ipasavyo kwenye sekta ya kilimo maana matokeo ya kazi ni tija stahiki.

0762656400 KWA MAWASILIANO 

HATIMAMAYE GUNINITA NA MGEJA WAHAMIA CHADEMA

MWENYEKITI wa Chama Cha Mapinduzi (CCM) Mkoa wa Shinyanga, Khamis Mgeja amesema chama hicho kimeacha misingi yake na sasa kimegeuka kuwa ya kampuni.

Mbali na hilo, pia alimpiga kijembe mgombea urais kupitia CCM, Dk. John Magufuli akimfananisha na dereva ambaye hajaweza kuendesha gari vizuri ‘learner’ akimaanisha kuwa hana uwezo wa kukiongoza chama hicho.

Mgeja alitoa kauli hiyo jana jijini Dar es Salaam wakati akitangaza kukihama chama hicho na kujiunga na Chama cha Demokrasia na Maendeleo (Chadema), huku akiambatana na aliyekuwa Mwenyekiti wa CCM Mkoa wa Dar es Salaam, John Guninita ambaye na yeye amejiunga na chama hicho kikuu cha upinzani nchini.

Mwanasiasa huyo mkongwe aliyepata kushika nyadhifa mbalimbali ndani ya CCM, alisema ametumika ndani ya chama hicho kwa muda mrefu huku akishiriki kurekebisha kasoro mbalimbali zilizojitokeza lakini sasa imefika mwisho.

“Pamoja na kuzirekebisha kasoro zilizojitokeza mara kadhaa lakini kila jambo lina mwisho wake na kurekebisha mambo hayo nayo inafika mwisho.

“Chama sasa kimekuwa cha BMW yaani cha baba, mama na watoto. Kwa maana hiyo chama kimekuwa cha kampuni au familia ndio maana maoni ya wanachama na wananchi yanapuuzwa,”alisema.

Mgeja ambaye pia aliongozana na makada wengine wa chama hicho, alisema yeye pamoja na wenyeviti takribani 23, wajumbe wa Halmashauri Kuu (NEC) pamoja na baadhi ya wabunge waliona mabadiliko yanahitajika ndani ya CCM.

“Matatizo ndani ya chama ni makubwa tunastahili tupate dereva fundi kwa sababu sisi tuliokitumikia chama tunakifahamu hapa tulipofika hivyo kinahitaji ukarabati mkubwa na tukashawishika kuwa Lowassa anaweza.

“Lakini kwa bahati mbaya mawazo ya wanachama, wananchi mwenyekiti wetu ameyapuuza. Nilikuwa navuta subira angekuwa muungwana angezungumza na kuomba radhi kwa aliyoyafanya kwani hayavulimiliki. Anakuja kwenye vikao vizito na akiwa na majina matano mfukoni.

 “Tukamwuliza atusomee sifa za hao wagombea watano lakini akafanya ubabe, akatengeneza nguvu kubwa, polisi wakazunguka lile jengo wakiwa na mabomu, farasi, gari ya maji ya washasha na hata ndani ya ukumbi polisi walikwepo wakiwa na mabomu.

“Nilimwuliza mwenyekiti kwamba leo tuko Burundi…tunawalalamikia kina Nkurunziza kumbe tunao wengi Tanzania. Tulipekuliwa na vijana wadogo wanakutana na hirizi zetu.

“Taswira ya chama imeondoka. Mliona kina Emmanuel Nchimbi walitoka wale hawakuwa wajinga waliona kasoro kubwa imefanyika,”alisema.

Alisema chama kimekuwa si kile cha wakati wa Mwalimu Nyerere kimejaa chuki, rushwa, fitna, kimepoteza mwelekeo na kwamba nguvu zilizotumika wakati wa kumpata mgombea urais ilikuwa hatari sana.

“Chama kilikuwa kinahitaji dereva fundi, lakini sasa kimekabidhiwa kwa Magufuli ambaye ni dereva leaner, hajawahi hata kuwa balozi wa nyumba kumi hata mimi hanifikii nusu, nilitegemea mwenyekiti wa chama angewaomba radhi wanachama lakini ameshindwa.

 “Mwenyekiti anakiacha chama vipande anaachaje kumweka Mwandosya kweli anazidiwa sifa na January Makamba, hata waziri mkuu wake ameshindwa kumwamini huku jana yake akimpongeza kuwa ni jembe lake.

 “Hata Sitta wakati ule wa spika alijitahidi ajibadilishe ikashindikana, sasa amemtumia bunge la katiba naye kachinjiwa mbali, Tyson, Sumaye wote wamechinjiwa mbali halafu anamuweka naibu waziri,”alisema.

Alisema kutokana na hayo ameamua kujiunga na Chadema kwenda kuongeza mapambano.

 “Kwanza nimuenzi Mwalimu Julius Nyerere aliposema kwamba watu wakiyataka mabadiliko wakayakosa ndani ya CCM wayatafute nje ya chama hiki. Sasa mimi ninamuenzi kwa moyo mkunjufu, nimeamua kuchana na CCM.

“Kwa heshima kabisa bila kumung’unya maneno natamka kujiunga na Chama cha Demokrasia na Maendeleo (Chadema) tukapambane huko,”alisema Mgeja huku akikunja ngumi na kusema ‘peoples’.

Pia aliwataka makada wa chama chake ambao wamekuwa na tabia ya kurusha vijembe na kumchafua Waziri Mkuu wa zamani, Edward Lowassa wakapambane kwenye midahalo kwa hoja.

“Kama wao ni wanaume sasa twende kwenye midahalo wasimung’unye maneno kusema ukweli. Na haya niliyoyafanya mimi na wenzangu ndiyo maamuzi magumu,”alisema.

GUNINITA                                       

Kwa upande wake aliyekuwa Mwenyekiti wa CCM Mkoa wa Dar es Salaam, John Guninita alisema amezaliwa akiwa CCM na kwamba alikitumikia chama hicho kwa muda wa miaka 35, lakini kutokana na kukiukwa kwa misingi ameamua kuhama.

Alisema ni dhahiri kuwa vijana wadogo ambao wanawatukana viongozi wenye umri zaidi ya baba zao, wametumwa chama.

“Haiwezekani kijana mdogo anamtukana viongozi wakubwa huku chama kikikaa kimya na mwishoni kupata uongozi kwa utaratibu wa uyoga uyoga, sijui laana hii wataipeleka wapi,”alihoji Guninita.

Alisema CCM kilipofikia sasa kinakufa kama ilivyokuwa kwa chama cha KANU cha Kenya na UNIP ya nchini Zambia.

“Binadamu anapozaliwa anakuwa na malengo yake, inafika unaugua na kufa na sasa CCM kinaugua na majibu ya dokta ni lazima yaonyeshe kuwa kimekufa,”alisema.

Alisema makada wa chama hicho ambao wamekuwa wakimshambulia Lowassa watashughulikanao kwenye kampeni na kwamba waziri mkuu huyo zamani akae kimya kwa kuwa yeye anawamudu.

“Edward atuachie sisi tuna uwezo wa kuwamudu hawa makuruta wa siasa wa aina ya Nape,”alisema Guninita.

Mwisho.

WANAOGAWA VIWANJA JANGWANI KUKIONA

MANISPAA ya Ilala imesema itawachukulia hatua watu wanaogawa viwanja kwa wamachinga katika eneo la jangwani kwa madai kuwa wameruhusiwa na uongozi kufanya hivyo.

Akizungumza na waandishi wa habari jana jijini Dar es Salaam, Mkurugenzi wa manispaa hiyo, Isaya Mngurumi alisema hawajamruhusu mtu yeyote kugawa viwanja bali waliwaruhusu kupanga chini bidhaa zao kama wanavyofanya katika mitaa ya kariakoo.

“Nimetuma timu kuwatafuta watu wanaogawa maeneo hayo kwani waliokimbilia huko si walengwa ni wajanja wachache tu,” alisema Mngurumi.

Alisema walikaa na uongozi wa manispaa ili kutafuta eneo la wafanyabiashara wadogo ndipo wakateua jangwani kuwa sehemu ya muda wakiwa bado wanaandaa masoko rasmi.

“Tumechagua jangwani upande wa kushoto wa barabara kama unaelekea kigogo kama sehemu ya muda kabla hatujaweka miundombinu ya vyoo wamevamia na kugawana bila ruksa ya manispaa,” alisema Mngurumi.

Alisema upande wa kulia wa barabara ni eneo la huduma za kijamii hasa uwanja wa mikutano ya hadhara na stendi ya mabasi yaendayo kasi.

Aidha alisema wako katika mkakati wa kujenga masoko ambayo yatawasaidia wafanyabiashara hao wadogo kuwa katika maeneo ya kudumu ya kufanyia shughuli zao.

Aliyataja masoko hayo kuwa ni Kisutu, Buguruni na Mchikichini ambapo wanaongea na wadau mbalimbali ili kupata mikopo kwa ajili ya ujenzi.

“Tumeingia mkataba na Benki ya TIB ili kujenga soko la kisutu kwa gharama ya sh. bilioni 11,” alisema.

mwisho  

         

TAHADHARI YATOLEWA KWA WANUNUA ARDHI

MKUU wa Wilaya ya Mkuranga, mkoani Pwani Abdallah Kihato amewatahadharisha watu wanaokwenda kununua ardhi katika wilaya yake hasa vijiji vinavyopakana na Ilala kuwa makini na matapeli wanaovamia maeneo hayo.

Akizungumza na Blog hii jana ofisini kwake, Kihato alisema kumeibuka malalamiko mengi hasa katika kijiji cha Tambani kuwepo matapeli wanaovamia mashamba yasiokuwa yao na kukata viwanja na kuuzia watu kwa madai kuwa eneo hilo liko Ilala.

“Ni muhimu kwa wanunuzi kufuata taratibu zote za ununuzi wa ardhi kwa kuwashirikisha viongozi wa kijiji ili kuthibitisha kama muuzaji ni eneo lake,” alisema kihato.

Alisema wanazo idara za ardhi kwa kila ngazi na upo utaratibu kwa mnunuzi na muuzaji kufika ofisi za kijiji kutambuliwa.

“Wakati mwingine watu wetu wanaingia katika migogoro hiyo kutokana na kuwa na haraka, wanakosa udadisi hawawezi hata kujiridhisha kwa majirani,” alisema Kihato.

Alisema wamekubaliana na Mkuu wa Wilaya ya Ilala kuwa na kikao cha pamoja cha kamati za ulinzi na usalama kutokana na lawama nyingi za uvamizi kuripotiwa kutokea maeneo ya Wilaya hiyo.

“Migogoro mingi imetokana na kuharibiwa kwa ramani ya mwaka 1974 inayoonyesha mipaka ya wilaya hizi mbili,” alisema.

Alisema hati nyingi zimeandikwa kuwa kijiji cha Tambani kiko Ilala kitu ambacho si kweli hakuna mtaa huo katika wilaya hiyo.

Migogoro hiyo ya ardhi katika eneo hilo imesababisha watu wawili kupoteza maisha yao kutokana na mapigano kati ya wakazi na jamii ya Wakurya wanaodaiwa kuvamia maeneo ambayo si ya kwao.

mwisho